持現金最大風險 不是輸通脹 而是……

香港樓市去年跌了一成半，雖然近日已經見中原城市領先指數回升，但很多人仍在觀望，原因是美國息口仍未見頂，全球經濟又有衰退危機，覺得樓價仍有機會跌，所以選擇先持有現金，等待入市的機會。加上股市、基金跌不少，有人會選擇先將資金買入這些流動性較高的資產走一轉，賺完再買樓，如此回報更高。但世事是否如此完美？

買樓…個個都想賺錢
然而如果想要賺到盡，往往偷雞唔到蝕渣米！
最近很多人問相類似的問題…持有現金？等佢再跌多啲，差唔多跌到底先買？你係咪真係等到呢？筆錢係咪真係等到呢？

首先，你係咪真係等到？
去年今日，很多朋友都說等樓價跌啲先買，今天普遍樓價跌了一、兩成，講價叻啲可能比高位買平兩、三成，又話睇佢可能會再跌，差唔多跌到底先買，幾時先係底呢？

所謂預測，其實都係估估吓，每個專家都有不同意見，信得邊個呢？好似2003年、2008年，大部份人都話要繼續跌，事實呢？真正底位，往往是事後睇番轉頭先知道的，過往幾次大跌市，無數朋友錯過機會，正是因為這個原因。

炒股蝕得更多

其次，筆錢係咪真係等到？
見過很多真人真事，有錢响身，自然身痕！

老爸正是一個例子，幾年前退休，有幾十萬退休金，原本叫他乖乖哋買層樓收租，點知佢走去炒股票，而家剩番十萬都唔夠！

又有個朋友2007年高位放咗個單位，攞住百幾萬，租樓住住先。2008年海嘯冇好好把握機會，2009年樓價反彈，升破佢賣樓個價，諗住叫佢追番層樓，點知佢話：「買唔到啦，剩番30幾萬咋！」原來炒股票輸晒！

筆者之前有個租客又係咁，很常見！講真，有幾何樓價不斷跌，股票會不斷升呢？

創業成功例子少

除了買股票，最常見的是投資做生意，筆者親身試過！
2010年的時候我們大舉進軍大圍，當時筆者買入一間金獅花園，建築面積約530呎的單位，兩年後賣出，扣除雜費，賺了幾十萬。

同年，美容院班拍檔話想搞多間分店，當時有閒錢，又見有前景，咪挾咗一筆囉，點知兩年都唔夠，已經蝕鬼晒！

後來又有一班朋友，計劃在廣州開間糖水店，鬼掩眼！租咗個新發展的美食城鋪位，後來美食城爛尾，沙塵滾滾，鬼影都冇！糖水鋪勉強經營，一個月做得幾千銀生意，幾個月就決定執笠！

好難理解，項目的總舵手是一位生意高手，點解會相信一個二、三線大陸發展商的所謂規劃？遇到問題點解唔立即變陣，搬去其他地方？兩個項目挾埋，金獅花園賺到的幾乎蝕晒！好在當年投資咗幾項物業，未算蝕入肉！

身痕才是最大風險

持有現金，等樓價再跌到底先買，風險甚高！
最大風險…可能不是加息、貶值、經濟逆轉，而是身痕！

如果閣下對自己其他方面的投資很有信心，例如閣下原來是一個隱世股神，或者是一個生意奇才，筆者並不反對。如果閣下只是一個打工仔，對投資、做生意沒有一定把握，不如趁勢買樓。

筆者所見香港經濟雖然處於下行週期，然而基礎尚算穩健，樓價跌到這個水平已經有投資價值。