買樓不等於買樓市 如何尋找抗跌力強的物業？

有朋友最近經常睇樓，想趁樓價下跌買番間上車，唔使再租人地方住。但又擔心買完之後樓價會繼續下跌，所以都係得個睇字，遲遲唔敢出手。於是他前來問筆者，覺得後市會唔會繼續下跌？如何揀選有抗跌力的物業？

股市有所謂…炒股不炒市，其實樓市亦是一樣！

大屋苑易受氣氛影響

在散戶眼中，買樓等於買樓市，經常都會問後市點睇，筆者每日都答幾次，散戶以為所有樓都跟大市走，大市升物業就升，大市跌物業就跌。大屋苑透明度高，確實較容易受氣氛影響，尤其是指標屋苑，如沙田第一城等，幾乎跟大市同步。

在資者眼中，買樓絕不等於買樓市，很多物業都是獨特的，不一定跟大市走，大市跌，你買的可以唔跌，甚至倒升，大市升，不代表你的物業會升，甚至倒跌，早年買入日出康城的朋友，必定感同身受，出面升到膨膨聲，自己的物業只有「保值」。

有發展的地區 物業抗跌力特別強

物業會否有抗跌力，其中一個重要元素…前景！
有前景、有將來的物業，即使大市跌，亦可以對沖！

筆者在2005年底上車，當時港島西的舊樓簡直係爛銅爛鐵，建築呎價才2000元，平過新界！西港島線落實之後，升到膨膨聲，外面升五成，佢就升一倍，外面升一倍，佢就升兩倍，當年以106萬買入，實用面積380多呎，樓齡逾30年的全海景單位，高峰期賣500萬！當年金融海嘯外面急跌三成，港島西的物業只微跌一成！

散戶都期望樓價大跌，一廂情願而已！
同愛情一樣，買賣係雙方面的，問過業主未呢？
你試吓走去一啲正在起鐵路的區域，嚇吓業主：「跌啦！快啲劈價賣啦！」
大部份業主都會氣定神閑：「我又唔係等錢洗，等通車先啦﹗做乜而家劈價賣俾你先？」

業主如何計數盤放價值

有數得計…樓市下跌幅度 VS 地區增值幅度

舉例，某舊區即將有地鐵通車，現時實用呎價10,000元；
若通車由於地區值，預期實用呎價升兩成，即12,000元；
若到時樓價下跌兩成，即是12,000元 X 0.8 = $9,600；
業主放盤時心裡都是計條數。

如何發掘有潛力區域？

可能又有人會問：「點知邊度有前景？」
係你自己冇做功課啫，其實好多基建項目，政府已經有晒諮詢，近年落成的有西港島線、南港島線、沙中線、高鐵線、港珠澳大橋。

仍在發展或即將發展的有啟德發展計劃、北部都會區、屯門南延線…已經有晒網站啦！

好多重建區，拆樓拆到膨膨聲，大角咀、深水埗、長沙灣、土瓜灣、觀塘…地盤圍晒板啦！唔通打開個手袋，啲錢就會响天度跌落嚟咩？想賺錢就要用心發掘！