買村屋又住又賺 係咪真係咁過癮？

很多工作好幾年的年青朋友，嚮往外國式的生活，香港有不少村屋，三層高，住地下更有機會有花園，親親大自然，地方大價錢又較市區樓貴，因此儲到第一筆首期，都心思思想買村屋，諗住又住又賺。

但如果是第一次買樓的新手朋友，其實我不太建議買村屋，除非你本身很熟悉！

從投資（買入）角度分析

買村屋的難度比一般私樓高，一般私樓有一定的標準，尤其是屋苑，大部份都是出自大發展商，即使質素有高低，但最少都是眾人目光焦點，難聽點說，差極有限。單幢樓質素比較參差，但最少都是發展商起的，全幢樓戶戶差唔多，就算自己唔識睇，睇吓樓上樓下有冇問題，有冇投訴，大致都掌握到，比較容易睇。

相反村屋很多時是私人興建的，每幢都唔同，你係咪真係識睇？再加上各處鄉村各處例，例如之前就試過有村屋出現路權糾紛，買咗樓冇公家路行入去，又試過有丁權、地權爭拗，還有僭建、污水系統等，你係咪識處理？難睇好多，風險較高。

從投資（賣出）角度分析

由於每幢村屋都唔同，相對難有標準去分析，加上位置通常比較偏遠，所以交投會比較疏落。因此銀行未必可以估得足借得足，將來賣樓的時候亦會較難出貨，如果唔熟，不是理想投資。

從自住角度分析

很多年青朋友都喜歡村屋，住大啲、住平啲，很多時候仲會有泊車位，可以過過駕駛癮。賬面成本確實比較平，例如標準村屋是每層700呎，一般$15000可以租到，差不多質素的單位，九龍區大約要$18000，表面上平一截，實際上係咪爭咁遠？

之前有朋友搬到新界北村屋，在火車站還要再轉小巴，每天到尖沙咀上班，來回車費要50至60元，小巴比較早收，玩夜咗或者OT夜咗要搭的士，每程300元！平均每月交通費近3000元，如果搬到尖沙咀附近的舊樓，例如佐敦、油麻地，每程車只需幾元，早啲出門口行路返工都仲得，計落成本其實差唔多。

朋友喜歡駕駛，最初見村屋包車位好開心，可以開車到處去，市區租個車位隨時要3000~4000元，但後來又發現原來唔係爭咁遠！因為開車出市區的油錢、路費等，來回一次超過100元，在公司附近搵位泊仲貴，日泊要150元。於是變了Sunday Driver！

實際支出其實慳不了多少，時間…才是損失最大的！

早起返工已經夠攰，每天上班來回交通要兩小時，返工放工繁忙時間人又多，搭港鐵往往冇位座要硬企，成身散晒。就算可以開車都唔好受，因為早起冇精神，仲要塞成個鐘車，也是受罪。

買市區樓  進可攻退可守

筆者剛剛相反，情願貴少少都住公司附近，近到可以走路上班，分享自己的想法，如果可以將每天兩小時交通省下來，將精神體力省下來，傾吓秘撈搵吓錢，再唔係瞓多覺，唔係仲好咩？

年青人喜歡自由、大自然生活無可厚非，去人哋屋企玩總是開心過癮的，但要自己每天來回則不容易，所以我建議，如果你真係想試試，可以租住先，試一年半載睇睇慣唔慣。買樓則可以買一些位置靚的、熱門的投資，進可攻退可守。