價值投資失效 股市如是 樓市如是

很多人都將買股票及買樓互相作比較，覺得買股票流動性高，雖然股價波動大，但只要採用價值投資法，買入優質股長線持有，就算股價下跌都不怕，因為他們深信遲早會回升。然而，近年有很多優質股相繼落難，就像以往被捧為「股王」的滙豐及騰訊，都令不少人損手。有些人輸股票輸到心淡，結果轉買樓。

我已經不再相信長線價值投資法了！
股市如是，樓市如是！

港股龍頭都要輸錢

過去十多年我已甚少買股票，不過有時朋友聚會聊天都會講起，不少股票當年是公認的優質股，時而世易，風光不再，就以持貨十年為例，如果你持有滙豐、中人壽，Sorry，輸錢！龍頭地產股，如長和、新地，唔好意思，都冇錢賺，如果入貨價唔靚甚至要輸少少。公用股好少少，例如中電、煤氣都有賺，但唔多。

有些朋友買科技股，有啲賺得幾勁，例如騰訊、比亞迪等，升了十倍、廿倍，甚至更多。問朋友為甚麼那麼有決心持貨十多年，買騰訊的朋友說，自己都估唔到科技會發展到這個境界，當年鬼估到街市買菜都要微信支付咩，純粹覺得科技是主流而已。

買比亞迪的朋友說，當年鬼估到電動車會取代燃油車咩，見Tesla年年蝕錢其實都驚，之前十年股價一直上上落落，一來又未輸錢，二來又信畢菲特，三來又唔係好得閒睇股票懶得換來換去，幾乎都唔記得咗，咪一直楂到而家囉，好彩咋！有趣！

港樓長升長有年代過去

所以嘛，長線價值投資，能賺錢的資產其實不多。
過去十年有科技龍頭護航，其他的很多都冇錢賺，甚至輸錢！
近日股市大跌，連這些科技龍頭都紛紛失守，堅持長揸不放的人，有些由賺變輸。

那麼，買樓呢？…長線價值投資亦不適用了！
香港樓嘛，長升長有的年代已經過去！

一）樓價實在太高

記得我第一間買的港島西單位，2005買入價是106萬，一個港島區的小屋苑380多呎而已，十多年後到我賣出的時候已經升到接近600萬，升了好幾倍，朋友問我為甚麼賣，難道再持貨十年，可以再升幾倍嗎？再升多幾倍豈不是要幾千萬？

二）政策影響太大

過去十多年，不同Section的樓價跟着政策走，當年推出SSD鎖死供應，高成數按揭控制在400/600萬，細價樓遠遠跑贏大市！近年推出15%從價印花稅、林鄭Plan，令到中價樓跑出，當年備受市場追捧的細價樓、市區舊樓，由天堂掉落凡間。

加上每人限購一伙，長線持有其實回報不高。
所以，香港樓的投資策略，應該是要不斷換貨！
然後，跳出Comfort Zone，繼續倍增資產，所以近年我們除了買住宅，亦會投資工商，會收購重建，會買大陸樓，如果不跳出框框，長線持有一層樓，賺得幾多？跟長線價值投資說再見吧！