新樓租金回報低，點解？

很多人會用租金回報率去衡量一層樓是否抵買，但新樓的租金回報通常特別低，隨時只得2厘。於是覺得偏貴，寧願轉買二手樓。仲有啲專家以此為由，分析樓市已經處於高位，入市有風險，係咪真  係咁？點解新樓租金一定比較低？

其實新樓租金偏低好正常…

租金回報 = 每年租金 ÷ 樓價

如果想租金回報高，好簡單…

(1)  租金高 或

(2) 樓價平 或

(3) 兩樣齊晒

新樓的租金回報，一般都會偏低！

簡單問一個問題：「新樓貴？定二手樓貴？定舊樓貴？」

相信個個都識答：「肯定新樓貴啦！」

原因有三

原因一：人普遍鍾意新樓  

如果兩者的價錢一樣，質素一樣，有得揀，大部份都鍾意新樓，這是人之常情！冇人住過嘛，第一手嘛，即是貴啲都會買啦！

原因二：示範單位只看到最好一面

另一個原因，大家都忽略了，就是新樓的銷售策略！

先講硬件，睇新樓的時候，你睇的是示範單位，一般都不在樓盤現場，而是在高級商場、寫字樓，你亦不會看到這個小區真實的一面，對面有工廠？樓下有街市？遠望見墳場？通通都見唔到！

單位的景觀都係段估冇辛苦。睇到的永遠都是最好的一面，美侖美奐的單位裝修、樓盤模型，還有廣告影片裡，都是來自歐美的俊男美女，誰知入伙之後，周圍只聽到廣東話與普通話！XD

原因三：現場銷售氣氛高漲

再講軟件，各大行都派出大量精英，幾個人服待你一個，前期的電話攻勢、現場的撈客攻勢、展銷廳內左右夾攻，還有現場無數的人群氣氛助攻，購買意欲自然高漲，如此費盡心思讓你擁有一個完美的置業夢，貴啲都值丫！將來你賣二手會有這些部署嗎？所以新樓樓價一般都會偏高，我們稱之為溢價。

租金低死穴： 入伙初期大量租盤

另一方面，租金又會低，點解？

二手樓放租，一個屋苑，最多得幾十個，甚至得幾個放盤。

新樓呢？入伙的時候，是幾百伙甚至過千伙一齊入伙的，假設當中有 1/3 是投資者會放租，隨時有百幾個甚至更多放盤，你想快啲租出？識做啦！減價！所以新盤劈租是正常的現象！

新樓 (1) 樓價偏高 (2) 租金偏低，回報自然低，很正常！

其實很多二手樓都有 3 厘以上的回報，如果你買舊樓的話要收到 4 厘以上回報是正常的事，再加上香港的利息偏低，所以即使租金回報不高，仍然有很多人搶着要買樓。